Azərbaycanda sirli “Ağ inqilab” – 5 il öncə nələr baş vermişdi?

Azərbaycanda “Ağ inqilab” kimi dəyərləndirilən prosesdən 5 il ötür. 2019-cu ilin oktyabrında “köhnə qvardiya”nın hakimiyyətdəki sonuncu nümayəndələri vəzifələrdən çıxarıldı.
Prezident Administrasiyasının sabiq rəhbəri, Azərbaycan Milli Elmlər Akademiyasının keçmiş prezidenti Ramiz Mehdiyev, Baş nazirin keçmiş müavini, Qaçqınların və Məcburi Köçkünlərin İşləri üzrə Dövlət Komitəsinin sabiq sədri Əli Həsənov, Bakı Şəhəri İcra Hakimiyyətinin keçmiş başçısı, Azərbaycan Respublikası Baş nazirinin sabiq müavini Hacıbala Abutalıbov, Azərbaycan Prezidentinin keçmiş köməkçisi Əli Həsənov və b. vəzifədən azad edildilər.

İqtidar komandası, demək olar, yeniləndi. Respublikanın baş prokuroru, daxili işlər naziri, DTX rəisi əvəzləndi, Silahlı Qüvvələrdə ciddi kadr yeniliyi oldu, icra hakimiyyəti strukturunda dəyişikliklər baş verdi. Bu tarixi proses, hakimiyyət yenilənməsi bəzi təhlilçilər tərəfindən “Ağ inqilab” kimi də dəyərləndirildi. Ölkənin siyasi və hərbi qanadında baş verən bu köklü dəyişikliklərin sonrakı dönəmdə, xüsusən İkinci Qarabağ müharibəsində mühüm rol oynadığı vurğulanır.

Əslində, yenilənmə prosesi 2018-ci ilin prezident seçkisindən sonra start götürmüşdü. Son 5 illik zaman kəsimində bu dəyişikliklər necə qiymətləndirilir?

Globalinfo.az-a danışan deputat Fazil Mustafa deyib ki, Prezident İlham Əliyevin hakimiyyəti müddətində aparılan ardıcıl, davamlı islahatlar bir çox sferada müsbət nəticə verdi və verməkdədir:

“Hər hansı bir inqilabi proses bəyanat və ya yeni mərhələyə keçidin elan edilməsi ilə ifadə olunur. Prezidentin kadr siyasəti, xüsusilə gəncləşdirmə tədbirləri hər kəsə məlumdur. Azərbaycanda kadr islahatı vaxtaşırı aparılır.

Yeni təyin edilən kadrlara baxdıqda kifayət qədər uğurlu olduqlarını görmək olar. Düzdür, özünü doğrultmayan, xalqla təmas qura bilməyən kadrlar da var. Lakin belələri uzun müddət vəzifədə qala bilmir. Amma idarəetməni asanlaşdıran, təması yüksək səviyyədə quran, xidmət edən kadrlar az deyil”.

F.Mustafa qeyd edib ki, son illərdə aparılan islahatlar nəticəsində xüsusən təhlükəsizlik sahəsində mükəmməl işlər görüldü:

“Bütövlükdə dövlətin, xalqın təhlükəsizliyinə xidmət edən sistem oturuşdu. İndiki rəhbərlik bu işi uğurlu aparır. DİN vasitəsilə ictimai sabitlik qurulub. Ümumiyyətlə, davamlı uğurlu islahat üçün bu, çox əhəmiyyətlidir.

Həmçinin hərb, miqrasiya kimi mühüm strateji sahələrdə aparılan kadr siyasəti uğurlu nəticələr verdi. Bütün bunlar ölkə başçısının kadr siyasətinin nəticəsidir.

Təyin edilən kadrlar da ilk növbədə Prezidenti qane etməli, fəaliyyət göstərdiyi sahədəki kontingenti razı salmalı və xalqa şəffaf xidmət etməlidir”.