MDB-yə üzv ölkələri ortaq tarix və müasir çağırışlar birləşdirir
Balanslaşdırılmış xarici siyasət kursu yürüdən Azərbaycan Respublikası bütün
dövlətlərlə qarşılıqlı dostluğa və əməkdaşlığa böyük əhəmiyyət verir. Ölkəmiz beynəlxalq və
regional təşkilatlarla da sıx münasibətlər quraraq milli maraqlarımızın təmin olunması
istiqamətində məqsədyönlü fəaliyyət göstərir. Qonşu dövlətlərlə qarşılıqlı hörmətə əsaslanan
münasibətlər qurmaq istiqamətində ardıcıl fəaliyyət göstərən Azərbaycan Respublikası,
bununla yanaşı hər zaman öz müstəqil xarici siyasət kursunu da qoruyub saxlayır. Ulu Öndər
Heydər Əliyevin 1993-cü ildə hakimiyyətə qayıdışından sonra yürüdülən uğurlu xarici siyasət
nəticəsində bu istiqamətdə qarşımıza qoyduğumuz əsas məqsədlərə nail ola bilmişik.
Azərbaycan Respublikasının sıx əməkdaşlıq münasibətləri qurduğu təşkilatlardan biri
də məhz Müstəqil Dövlətlər Birliyidir. Keçmiş ittifaq məkanında yaradılan Müstəqil Dövlətlər
Birliyinə üzv ölkələri ortaq tarix və müasir çağırışlar birləşdirir. Azərbaycanın keçmiş ittifaqa
daxil olan dövlətlərin yaratdığı Müstəqil Dövlətlər Birliyində uğurlu təmsilçiliyi, xalqımızın
Ümummilli Lideri Heydər Əliyevin siyasi iradəsi sayəsində baş tutub. Respublikamızın MDB
ilə əlaqələri, o cümlədən də quruma daxil olan ayrı-ayrı dövlətlərlə ikitərəfli münasibətləri
qarşılıqlı hörmət prinsipinə əsaslanır və milli maraqlarımıza xidmət edir. Belə rasional
siyasətin nəticəsidir ki, respublikamızın MDB-də təmsil olunan ayrı-ayrı dövlətlərlə yüksək
səviyyəli münasibətləri formalaşıb.
Ötən dövrdə MDB özünü müstəqil dövlətlərin səmərəli əməkdaşlıq platforması kimi
təsdiqləyib. Quruma daxil olan dövlətlər bir sıra istiqamətlər üzrə öz fəaliyyətlərini uzlaşdırıblar
ki, bu da regional təhlükəsizliyin təmin olunmasına və qarşılıqlı maraqlara əsaslanan
əməkdaşlığın dərinləşməsinə öz müsbət təsirini göstərir. Terrorizm, narkotiklərin qeyri-qanuni
dövriyyəsi, iqtisadi sahədə cinayətkarlıq, qanunsuz miqrasiya, insan alverinə qarşı mübarizə
məsələləri MDB-yə daxil olan dövlətlərin qarşılıqlı fəaliyyətinin əsas istiqamətlərini təşkil edir.
8 oktyabr 2024-cü il tarixində Moskvada Müstəqil Dövlətlər Birliyi Dövlət Başçıları
Şurasının iclasında çıxışı zamanı Cənab Prezident İlham Əliyev Azərbaycan Respublikasına
münasibətdə yol verilən əsassız ittihamlar haqqında məlumat verdi. Ölkə başçımız “Rossiya-
1” televiziya kanalına verdiyi müsahibədə beynəlxalq sanksiyaların ədalətsiz şəkildə tətbiqi
məsələsini də xüsusi vurğuladı və qeyd etdi ki, biz istənilən sanksiyalara qəti şəkildə qarşıyıq.
Beynəlxalq ictimaiyyət öz mövqeyini vahid qaydada bildirməlidir. Biz milli səviyyədə özümüzə
qarşı, həm də təkcə bizə deyil, tətbiq olunan bütün sanksiyalara münasibətdə bu mövqeyi
ifadə edirik. Cənab İlham Əliyev əlavə etdi ki, bizə sanksiyalar 1992-ci ildə, Azərbaycan
ərazilərinin Ermənistanın işğalı altında olduğu bir vaxtda ölkəmizin “Ermənistanı blokadada
saxlaması” barədə qondarma ittihamla tətbiq edilmişdi. Bu sanksiyalar 2001-ci ildə, ABŞ-ın öz
yüklərini hava, quru və dəniz yolu ilə Azərbaycan ərazisindən Əfqanıstana tranzit daşımalı
olduğu vaxt aradan qaldırılmışdı.
Azərbaycan Respublikası hər zaman beynəlxalq hüququn norma və prinsiplərinə
hörmətlə yanaşıb və bundan sonra da hörmətlə yanaşacaq. Qərb ölkələrinin isə dünyada baş
verən proseslərə ikili standartlar və şəxsi maraqlar mövqeyindən yanaşmaları
qəbuledilməzdir. Qərbin belə ədalətsiz mövqe sərgiləməsi Qalib Azərbaycan dövlətini öz qəti
və ədalətli mövqeyindən çəkindirə bilməz.
Murad Həsənli,
Sabirabad rayonu, Mil-Muğan Regional Gənclər və İdman İdarəsində Gənclərlə iş
sektorunun müdiri