"Azərbaycan Dəmir Yolları"nın daha bir maşinisti 20 455 manatlıq yanacaq satıb - HÖKM
Salyan Rayon Məhkəməsində vəzifə səlahiyyətlərindən sui-istifadə, vəzifə saxtakarlığı və mənimsəmədə təqsirləndirilən Emil Əsədovun (şərti) cinayət işi üzrə məhkəmə istintaqı yekunlaşıb.
Hakim Vəsilə Əliyevanın sədrliyi ilə keçirilən prosesdə hökm oxunub.Məhkəmənin hökmü ilə ona 2 il 3 ay müddətinə azadlıqdan məhrumetmə cəzası təyin edilib.İttihama görə, Emil Əsədov "Azərbaycan Dəmir Yolları" QSC-nin n İnfrastruktur departamentinin Qatarların idarə edilməsi xidmətinin Salyan lokomotivlərinin idarə edilməsi sahəsinin magistral üzrə teplovoz maşınisti vəzifəsində işləyib.
O, ezam olunduğu Ucar-Hacıqabul-Ucar və Ucar-Yevlax-Ucar istiqamətləri üzrə 2022-ci ilin may ayından 2023-cü ilin fevral ayınadək olan dövrdə lokomotivlərin hərəkətinin təmin edilməsi üçün QSC tərəfindən ayrılmış yanacaq və yağın, yəni həmin cəmiyyətə məxsus olmaqla ona etibar olunmuş özgə əmlakını qulluq mövqeyindən istifadə etməklə vahid niyyətlə talayıb. Emil bu məqsədi ilə lokomotivlərdə hərəkət marşrutunun yerinə yetirilməsi üçün kifayət qədər yanacaq və yağın olmasına baxmayaraq, marşrut vərəqələrinə həqiqətə uyğun olmayan marşrutlar qeyd edilməsi ilə müvafiq həqiqətə uyğun olmayan marşrutlar üzrə nəzərdə tutulmuş yanacaq və yağın təminat məntəqəsindən götürülərək, Ucar, Yevlax və Hacıqabul rayonu ərazisində müxtəlif şəxslərə satıb.
O, bu yolla 20 455 manat pul vəsaitini mənimsəmə və israf etmə yolu ilə talayıb.İstintaq dövründə Emil Əsədovun barəsində həbs qətimkan tədbiri seçilmişdi.Qeyd: Daha əvvəl QSC-nin İnfrastuktur departamentinin Qatarların idarə edilməsi sahəsinin magistral üzrə teplavoz maşinist vəzifəsində işləmiş Cəmil Cəmilov (şərti) eyni üsulla yanacağı Gəncə şəhəri və Ağstafa rayonu ərazisində müxtəlif şəxslərə 6359,26 manata satılıb gəlir əldə edib.pravda.az
