Yağışdan zərər görmüş bu şəxslərə yardım ediləcək - AÇIQLAMA
Ötən günlər ərzində ölkə ərazisində qeydə alınan intensiv yağışlar nəticəsində bir qism daşınmaz və daşınar əmlaklara, o cümlədən avtonəqliyyat vasitələrinə zərər dəymişdir. Bu zərərlərlə bağlı Assosiasiyamıza, o cümlədən sığorta şirkətlərinə də çoxsaylı müraciətlər daxil olur.
Bu barədə Azərbaycan Sığortaçılar Assosiasiyasından Milli.Az-ın sorğusuna cavab olaraq bildirilib.
Qeyd olunub ki, daşınmaz əmlakı Daşınmaz əmlakın icbari sığortası növü üzrə, daşınar əmlakı isə Əmlakın yanğından və digər risklərdən sığortası növü üzrə sığortalanmış vətəndaşlar sığortalandıqları müvafiq sığorta şirkətlərinə müraciət edə bilərlər.
O cümlədən avtonəqliyyat vasitəsi Kasko üzrə sığortalanmış vətəndaşlar da öz sığorta şirkətlərinə müraciət edərək hadisənin qeydiyyata alınmasını təmin etməlidir ki, bununla da zərərin tənzimlənməsi həyata keçiriləcək.
