Fransada bir neçə həbsxanaya atəş açılıb və avtomobillər yandırılıb

Fransada bir sıra həbsxanalar avtomobilləri yandıran və atəş açan cinayətkarların hücumuna məruz qalıb.

1xeber.media xəbər verir ki, bu barədə aprelin 15-də BFMTV kanalı məlumat yayıb.

Məqalədə deyilir: “Bir neçə həbsxana koordinasiyalı hücumlara məruz qalıb, bu zaman maşınlar yandırılıb, avtomat silahlardan atəş açılıb.

Luynesdə (Buş-du-Ron departamenti) və Valensdə (Drom departamenti) naməlum şəxslərin həbsxananın dayanacağında avtomobilləri yandırdığı dəqiqləşdirilir. Tulonda (Var departamenti) həbsxana qapılarına avtomat silahlardan atəş açılıb.

Kanalın mənbələrinə görə, bu yandırma “əməliyyatı” narkotik vasitələrin qanunsuz dövriyyəsinə qarşı mübarizə çərçivəsində yüksək mühafizəli həbsxanaların yaradılması planına cavab olan koordinasiyalı hücum olub.