Ərdoğan Putin və Zelenski ilə danışıqlardan danışıb

Türkiyə prezidenti Rəcəb Tayyib Ərdoğan mayın 11-də rusiyalı həmkarı Vladimir Putinlə danışıqlar apardığını, mayın 12-də isə Ukrayna lideri Vladimir Zelenski ilə danışdığını bildirib.

1xeber.media xəbər verir ki, bu barədə TASS məlumat yayıb.

Ərdoğan Putinlə Ukrayna ilə bağlı danışıqlarının hərtərəfli olduğunu bildirib. “Biz cənab Putinlə bir çox mühüm məsələləri müzakirə etdik, o cümlədən Rusiya və Ukrayna arasında davam edən münaqişənin dayandırılması”, - deyə siyasətçi bildirib.

O, həmçinin xatırladıb ki, ötən həftə ABŞ prezidenti Donald Trampla da danışıb və onunla münaqişənin dayandırılması üçün ölkələrin ata biləcəyi addımları müzakirə edib.

Bundan əvvəl Putin və Ərdoğan arasında telefon danışığı olub və onlar İstanbulda Rusiyanın Ukrayna ilə birbaşa danışıqlara dair təklifini müzakirə ediblər. Türkiyə lideri Rusiyanın təşəbbüsünü dəstəkləyib və ölkəsində danışıqlar üçün platforma təqdim etməyə, eləcə də davamlı sülhə nail olmaq üçün danışıqların təşkilinə yardım etməyə hazır olduğunu bəyan edib.