Braziliyada yük maşını ilə avtobusun toqquşması nəticəsində 11 nəfər həyatını itirib

Braziliyada yük maşını ilə şəhərlərarası avtobusun toqquşması nəticəsində azı 11 nəfər ölüb.

1xeber.media xəbər verir ki, bu barədə Reuters agentliyi Braziliya polisinə istinadən məlumat yayıb.

"Braziliyanın mərkəzi-qərbində yerləşən Mato Qrosso ştatında avtobus və yük maşınının toqquşması nəticəsində 11 nəfər ölüb, 45 nəfər yaralanıb", - məlumatda deyilir.
Polisin məlumatına görə, qəza nəticəsində xəsarət alanlardan 11-nin vəziyyəti ağır, 26-nın vəziyyəti orta ağır, daha 8 nəfər isə yüngül xəsarət alıb, onların hamısı xəstəxanalara çatdırılıb.

Qəza Braziliyanın mərkəzində yerləşən Kuyaba şəhərindən (Mato Qrosso ştatının paytaxtı) 360 km aralıda magistral yolda baş verib.

Ötən gün ABŞ-ın Texas ştatında baş verən yol qəzasında beş qız həlak olub. Qızlar ad günlərindən birini göl evində qeyd etmək üçün Dallasdan Kinqslendə Mercedes-Benz SUV ilə gedirdilər. Oraya çatmazdan bir qədər əvvəl onların avtomobili qoşqulu yük maşını ilə toqquşub və qəflətən qarşıdan gələn zolağa çıxıb.

Avqustun 7-də Sudanın şimal-şərqində tur avtobusunun yük maşını ilə toqquşması nəticəsində azı 13 nəfər ölüb, 23 nəfər yaralanıb. Ölümlə nəticələnən qəzaya sürət həddinin aşılması, düzgün keçməməsi və sürücülərdən birinin səhlənkarlığı səbəb olub.