İsveç Rusiya səfirini çağırıb

İsveç Xarici İşlər Nazirliyi Rusiyanın Stokholmdakı səfiri Sergey Belyayevi Avropa İttifaqının (Aİ) Kiyevdəki missiyasının binasına ziyan dəyməsi ilə bağlı məlumatla əlaqədar çağırıb.

1xeber.media xəbər verir ki, bu barədə X sosial şəbəkəsində Krallığın Xarici İşlər Nazirliyinin rəhbəri Mariya Stenerqaard məlumat verib.

"Bu gün Xarici İşlər Nazirliyi Ukrayna şəhərlərinə davam edən hücumlarla əlaqədar Rusiya səfirini çağırıb. Avqustun 28-də baş vermiş hücum nəticəsində Aİ-nin Kiyevdəki missiyasının binasına ziyan dəyib", - məlumatda deyilir.

Bundan əvvəl Aİ-nin xarici işlər üzrə ali nümayəndəsi Kaja Kallas Rusiyanın İttifaqdakı daimi nümayəndəsi səlahiyyətlərini icra edən Karen Malayanın Aİ-nin Kiyevdəki missiyasının binasına dəymiş ziyanla bağlı Aİ-nin Brüsseldəki mənzil-qərargahına çağırıldığını bildirmişdi.

Avqustun 28-də Avropa Komissiyasının rəhbəri Ursula fon der Leyen Kiyevə gecə zərbələri zamanı Aİ missiyasının binasının zədələndiyini bildirib. Onun sözlərinə görə, diplomatik missiyanın əməkdaşlarından heç biri xəsarət almayıb.