Zaxarova Britaniyaya xəbərdarlıq etdi

Rusiya Böyük Britaniyanın Rusiya gəmilərini ələ keçirmək təhdidini həyata keçirməsini dəniz qanunvericiliyinin pozulması kimi qiymətləndirəcək.  1xeber.media xəbər verir ki, Rusiya Xarici İşlər Nazirliyinin sözçüsü Mariya Zaxarova bu xəbərdarlığı brifinq zamanı Londona verib.

"İlk növbədə, bu düşüncə prosesi, əlbəttə ki, Rusiyanın maraqlarına zərər verməyə yönəlib. Biz bu cür aqressiv niyyətlərin həyata keçirilməsini Britaniyanın özlərinin qətiyyətlə müdafiə etdiyi 1982-ci il BMT-nin Dəniz Hüququ haqqında Konvensiyasının birbaşa pozulması kimi qiymətləndirəcəyik", - deyə diplomat bildirib.

Daha əvvəl "The Times" qəzeti mənbələrə istinadən bildirib ki, Böyük Britaniya hakimiyyəti Rusiyanın sözdə kölgə donanması ilə əlaqəli tankerlərin mümkün ələ keçirilməsi və saxlanılması üçün hüquqi əsaslar tapıb. Qeyd olunur ki, Britaniya hakimiyyəti bu məqsədlər üçün 2018-ci il Çirkli Pulların Yuyulması və Sanksiyalar Qanununu tətbiq etməyi planlaşdırır.