Mədəniyyət Nazirliyinin qurumu 366 min manata mehmanxana xidməti alır

Mədəniyyət Nazirliyinin tabeliyində fəaliyyət göstərən “Əsaslı Tikinti və Təchizat” MMC mehmanxana xidmətlərinin satın alınması ilə bağlı tender elan edib.

1xeber.media 32gun.az-a istinadla  xəbər verir ki, satınalma Bakı şəhəri üzrə müxtəlif kateqoriyalı hotellərdə qonaqlama xidmətlərini əhatə edir. Ehtimal olunan ümumi məbləğ 366.900,00 manat təşkil edir.

Sənədlərə əsasən, satınalma çərçivəsində 5 ulduzlu və 4 ulduzlu hotellərdə təknəfərlik və ikinəfərlik standart otaqların, eləcə də delüks otaqların sifarişi nəzərdə tutulur. Hər bir xidmət üzrə 100 ədəd olmaqla, səhər yeməyi daxil 1 otaq x 1 gün prinsipi ilə qonaqlama planlaşdırılıb.

Belə ki, siyahıda Bakı şəhəri üzrə:

5 ulduzlu hotellərdə təknəfərlik standart otaqlar,

4 ulduzlu hotellərdə təknəfərlik standart otaqlar,

5 ulduzlu hotellərdə ikinəfərlik standart otaqlar,

4 ulduzlu hotellərdə ikinəfərlik standart otaqlar,

5 ulduzlu hotellərdə təknəfərlik delüks otaqlar,

4 ulduzlu hotellərdə təknəfərlik delüks otaqlar

və digər oxşar xidmətlər yer alıb.

Satınalmanın hansı tədbir və ya layihə çərçivəsində həyata keçiriləcəyi ilə bağlı məlumat açıqlanmayıb.