İsrailin qiymətləndirməsinə görə, İranda aparılan “Şir nəriltisi” əməliyyatı çox uğurludur

1xeber.media xəbər verir ki,bu barədə Ynet nəşrinin hərbi məsələlər üzrə icmalçısı Ron Ben-İşay yazıb.

“Biz müharibənin onuncu gününə planlaşdırdığımızdan xeyli çox nəticə əldə etmişik”, - deyə təhlükəsizlik sahəsindəki mənbə bildirib.

Nəşrin məlumatına görə, əməliyyatın ilk beş-altı günü ərzində İsrail qüvvələri İranın aşkarlama sistemlərini və hava hücumundan müdafiə vasitələrini əhəmiyyətli dərəcədə zəiflədə bilib. Bu isə İsrail aviasiyasına İranın qərb, şimal və mərkəzi hissələrinin hava məkanında sərbəst fəaliyyət imkanı verib.

Eyni zamanda qeyd olunur ki, mühüm nəticələrdən biri də İranın uzaqmənzilli ballistik raket sistemlərinin sürətlə zərərsizləşdirilməsi olub. Bu raketlər İsrail ərazisi üçün əsas təhlükələrdən biri hesab edilirdi.

Bu müddətdə yüzlərlə raket buraxılış qurğusu məhv edilib, digər buraxılış sistemləri sıradan çıxarılıb və yüzlərlə raket zərərsizləşdirilib. Hərbi icmalçının qiymətləndirməsinə görə, nəticədə İran artıq ilkin planını - İsrailə hər gün onlarla raketdən ibarət salvo zərbələri endirmək planını - həyata keçirə bilmir.

Hazırda raketlər əsasən tək-tək buraxılır və mütəxəssislərin fikrincə, onların sayı gələcəkdə daha da azalacaq.

Məqalədə qeyd olunur ki, hazırda İsrailin əsas məqsədi İranın hərbi-sənaye kompleksinə məxsus obyektlərə və infrastruktura zərbələr endirməkdir. Məhz bu obyektlərdə ballistik raketlər hazırlanır və istehsal olunur, raket yanacağı yaradılır, idarəetmə sistemləri və buraxılış qurğuları istehsal edilir, həmçinin zərbə və kamikadze pilotsuz uçuş aparatları hazırlanır və nüvə proqramı ilə bağlı işlər aparılır.

Bu obyektlər hücumların əsas prioritetinə çevrilib.

Nəşr qeyd edir ki, İsrail mənbələrinin etirafına görə, İsrail Ordusu (SAXAL) bu vəzifəni təkbaşına tam yerinə yetirə bilməz. Buna görə də martın 10-dan etibarən ABŞ İranın hərbi-sənaye kompleksinə qarşı zərbələrə fəal şəkildə qoşulub.

Amerika qüvvələri yalnız İranın cənubunda deyil, İslam Respublikasının müxtəlif bölgələrində fəaliyyət göstərir və artıq zərbələr endirir.

Əməliyyatın ikinci istiqaməti isə İran rejiminə məxsus obyektlərə və idarəetmə strukturlarına yönəlib. Xüsusilə SEPAH, “Bəsic” və daxili təhlükəsizlik strukturlarının qərargahlarına zərbələr endirilir.

Həmçinin İran silahlı qüvvələrinin fəaliyyətinin koordinasiya edildiyi idarəetmə mərkəzləri də hücumların hədəfinə çevrilib. Xüsusi diqqət isə İranın xaricdəki müttəfiq qruplaşmalarını, xüsusilə “Hizbullah”ı dəstəkləyən “Qüds qüvvələri”nin komandirlərinin və strukturlarının zərərsizləşdirilməsinə yönəldilib.

İsrail tərəfinin məlumatına görə, hazırda İran qüvvələrinin idarəetmə effektivliyi aşağı səviyyədədir. Ayrı-ayrı bölmələrdə komandanlıq və nəzarət problemləri, xaos və hətta dezertirlik halları barədə məlumat verilir.

Rəsmi şəxslərin sərt bəyanatlarına baxmayaraq, İran hakimiyyəti ciddi təzyiq altındadır. Qərb və İsrail analitiklərinin fikrincə, ölkədə rejim dəyişikliyi ehtimalı istisna edilmir.

Eyni zamanda, Tehranın hazırkı strategiyası müharibədən sağ çıxmağa çalışmaq və enerji bazarı vasitəsilə ABŞ-a təzyiq göstərməkdən ibarətdir. Bu isə Hörmüz boğazının bağlanması ehtimalı, qlobal neft qiymətlərinin artması və ABŞ-ın müttəfiqi olan Fars körfəzi ərəb ölkələrinə hücumlarla müşayiət oluna bilər.