Yük maşınları Qazaxıstan-Rusiya sərhədində qaldı

Qazaxıstan-Rusiya sərhədində, Pavlodar vilayətindəki “Kosak” keçid məntəqəsində yük nəqliyyat vasitələrinin sıxlığı müşahidə olunur.

1xeber.media xəbər verir ki, bu barədə Qazaxıstan Milli Təhlükəsizlik Komitəsinin Sərhəd Xidməti məlumat yayıb.

Məlumata görə, mövcud vəziyyət meyvə-tərəvəz məhsullarının daşınmasında mövsümi artımla əlaqədardır.

Gözləmə müddətini azaltmaq üçün keçid məntəqəsi gücləndirilmiş iş rejimində işləyir. Yerli hakimiyyət orqanları ilə qarşılıqlı əlaqə qurulub və lazımi tədbirlər görülür.

Sərhəd Xidməti xatırladıb ki, Pavlodar vilayətində “Şarbaktı” və “Urlyutobe” beynəlxalq sərhəd keçid məntəqələri, Şimali Qazaxıstan vilayətində isə “Jana Jol”, “Karakoqa” və “Kızıl Jar” sərhəd keçid məntəqələri fəaliyyət göstərir.

Bundan əlavə, sərhəd keçid tarixini və yerini əvvəlcədən seçməyə imkan verən elektron növbə sistemi mövcuddur.

“Kosak” keçid məntəqəsinin orta buraxılış gücü gündə təxminən 200-220 yük maşını təşkil edir.