Вернуться назад Распечатать

"Cənab nazirə demək istəyirəm ki, məni başqaları ilə qarışdırmasınlar! " - QALMAQAL!

"Söz-söhbət gəzir ki, cənab nazir Adil Kərimli Akademik Milli Dram Teatrına geri dönmək istəyimlə bağlı mənə verilən “ştat yoxdur” cavabına ünvanladığım suallara münasibət bildirərkən belə bir fikir səsləndirib: “Fikir verməyin, 5-6 gün yazacaq, danışacaq, sonra da susacaq.”

Bu məlumatın nə dərəcədə doğru olduğunu bilmirəm..." 
1xeber.media  xəbər verir ki, bunu özünün sosial şəbəkə hesabında tanınmış sənət adamı, əməkdar artist Mehriban Xanlarova qeyd edib.
O daha sonra fikrini belə davam etdirir: "Lakin əgər həqiqətən belə bir fikir səsləndirilibsə, cənab nazirə demək istəyirəm ki, məni başqaları ilə qarışdırmasınlar! Mən haqq səsim eşidilənə və doğma teatrıma qovuşana qədər mübarizəmi davam etdirəcəyəm! Çünki mən Prezidentimə güvənirəm! Səsim eşidilənə qədər haqq mübarizəmdən geri çəkilməyəcəyəm!
Mən xalqımızın sevgisini qazanmış bir sənət adamıyam. Siz də bu məsələdə xalqın mənə olan sevgisinin və dəstəyinin şahidi olursunuz. Mən hər zaman haqsızlıqla üzləşən, hüquqları pozulan insanların yanında olmuş, onların problemlərinin həlli üçün çalışmışam. Bəzən buna görə özüm də təzyiqlərlə üzləşmişəm. Lakin heç vaxt geri çəkilməmiş, haqq mübarizəmdən dönməmiş və sonadək mübarizə aparmışam!
Bu gün isə söhbət mənim öz taleyimdən, ailəmin taleyindən və 92 yaşlı, aciz bir Azərbaycan anasının faciəsindən gedir. Ona görə də mənim 5-6 gündən sonra susacağıma ümid etməyin. Mən bilirəm ki, mənim və ailəmin yaşadığı bu ağır vəziyyət hələ də Cənab Prezidentə çatdırılmayıb. Dövlətimizin daha böyük problemlərlə məşğul olan səlahiyyətli şəxsləri işlərinin çoxluğundan bəlkə də hələ mənim səsimi eşitməyiblər. Amma inanıram ki, bu məsələdən xəbər tutduqları gün ən azı belə deyəcəklər: “Çağırın o qadını, üzbəüz dinləyin. Görək nə baş verir?”
Axı söhbət ömrünü Azərbaycan mədəniyyətinə həsr etmiş bir Əməkdar Artistdən, Prezident mükafatçısından gedir.
Mən doğma teatrıma qovuşana qədər çıxışlarıma davam edəcəyəm! Məni bu yola məcbur etdilər... Məni bu mübarizəyə sövq etdilər...
İnanıram ki, həqiqət üzə çıxanda bir çoxlarının vəziyyəti mənimkindən daha ağır olacaq...
Ona görə də, cənab nazir, mənim 5-6 gündən sonra susacağıma ümid etməyin! QƏTİYYƏN!.."