Paşinyan yeni Konstitusiya ilə bağlı planları açıqladı

Ermənistanın Baş naziri Nikol Paşinyan ölkədə yeni Konstitusiyanın qəbulunun hakim Vətəndaş Müqaviləsi Partiyası üçün hələ də gündəmdə olduğunu bəyan edib.

1xeber.media xəbər verir ki, Konstitusiya Günü münasibətilə xalqa müraciət edən Paşinyan bildirib ki, parlament seçkilərinin nəticələrinə əsasən formalaşmış hakim çoxluğun seçki proqramında da yeni Konstitusiyanın qəbulu yer alır.

Baş nazirin sözlərinə görə, Konstitusiyanın əsas vəzifəsi ölkədə hüquq qaydasının və konstitusiya quruluşunun təsbit edilməsi, həmçinin bu quruluşun xalqla üzvi bağlılığının təmin olunmasıdır.

Paşinyan qeyd edib ki, Konstitusiya ölkədə insanların həyatını tənzimləyən qaydaları müəyyənləşdirir və bu qaydaların kim tərəfindən, hansı iradə ilə qəbul edilməsi xüsusi əhəmiyyət daşıyır.

O vurğulayıb ki, bu qaydalar yalnız xalqın azad iradəsi ilə müəyyən edilməlidir və bu, dövlətin sabitliyi və inkişafının əsas şərtlərindən biridir.

Baş nazir hesab edir ki, Ermənistan müstəqillik əldə etdikdən sonra bu prinsip ciddi şəkildə pozulub və ölkə vətəndaşlarında mövcud hüquq qaydasının məhz onların iradəsindən qaynaqlandığına dair inam formalaşmayıb.