Kreml Çinin ballistik raket buraxılışına münasibət bildirdi

1xeber.media xəbər verir ki, Rusiya Prezidentinin mətbuat katibi Dmitri Peskov RİA Novosti agentliyinə verdiyi açıqlamada bildirib ki, Çinin ballistik raket sınaqları onun suveren hüququdur.

Kreml sözçüsü vurğulayıb: "Biz inanırıq ki, raketlərini sınaqdan keçirmək və hərbi inkişafla məşğul olmaq Çinin suveren hüququdur".

Peskov həmçinin əlavə edib ki, Çin Asiya-Sakit okean regionunda heç bir gücə təhlükə yaratmır və Pekinin Moskva ilə hərbi tərəfdaşlığı, o cümlədən dəniz sahəsində heç bir üçüncü ölkəyə qarşı yönəlməyib.

Daha əvvəl Çin, Avstraliyanın Sakit okean ölkəsi Fici ilə ittifaq imzalamasından bir neçə saat sonra Sarı dənizdəki Lüşun bazası yaxınlığındakı 094 tipli ballistik raket sualtı qayığından (SSBN) ballistik raket buraxıb. Kanberra və Suva Çinin regiondakı mövcudluğuna qarşı çıxmağı hədəfləyən "Sülh Okeanı" adlı ittifaq yaratmaq barədə razılığa gəliblər.