ABŞ-ın İrana yeni zərbələri: Hörmüz boğazında gərginlik yenidən artır

ABŞ Silahlı Qüvvələri İranın Hörmüz boğazında ticarət gəmilərinə qarşı həyata keçirdiyi hücumlardan sonra ölkənin cənubunda yerləşən bir sıra hərbi obyektlərə yeni hava zərbələri endirib.

1xeber.media xəbər verir ki, ABŞ Müdafiə Nazirliyi əməliyyatın əsas məqsədinin İranın gəmiçiliyə təhlükə yaratmaq imkanlarını zəiflətmək və beynəlxalq dəniz yollarında təhlükəsizliyi bərpa etmək olduğunu açıqlayıb. Zərbələrin raket sistemləri, pilotsuz uçuş aparatları bazaları və hərbi infrastruktur obyektlərini hədəf aldığı bildirilir.  

İran isə cavab olaraq ABŞ-ın bölgədəki hərbi mövcudluğuna qarşı cavab tədbirləri görəcəyini bəyan edib. Məlumata görə, Bəhreyn və Küveytdə hava hücumundan müdafiə sistemləri yüksək döyüş hazırlığı vəziyyətinə gətirilib. Bölgədə təhlükəsizlik tədbirləri maksimum səviyyəyə qaldırılıb.  

Ekspertlər hesab edirlər ki, hadisələrin bu istiqamətdə inkişafı qlobal enerji bazarına da ciddi təsir göstərə bilər. Hörmüz boğazı dünya neft daşımalarının əsas marşrutlarından biri hesab olunduğundan, bölgədə hərbi gərginliyin artması neft qiymətlərində yeni bahalaşma riskini artırır. Artıq beynəlxalq birjalarda neft qiymətlərində yüksəliş qeydə alınıb.  

Hadisələr NATO-nun Ankara sammitindən dərhal sonra baş verdiyi üçün beynəlxalq ictimaiyyət vəziyyətin daha da gərginləşməsinin qarşısını almaq məqsədilə diplomatik çağırışlarını davam etdirir.