Ərdoğanın hədiyyə etdiyi revolveri kimlər özü ilə apara bilməyib?

Türkiyə Prezidenti Rəcəb Tayyib Ərdoğanın NATO sammitindən sonra müttəfiq ölkələrin liderlərinə təqdim etdiyi qeyri-adi hədiyyə təhlükəsizlik məsələləri ilə bağlı müzakirələrə səbəb olub.

1xeber.media “The Guardian” nəşrinə istinadla xəbər verir ki, Ankarada keçirilən görüşlərdən sonra bir sıra NATO liderlərinə üzərində adları həkk olunan, içərisində altı güllə olan revolverlər hədiyyə edilib.
Hədiyyə barədə ilk açıqlama verənlərdən biri Böyük Britaniyanın Baş naziri Kir Starmer olub. O bildirib ki, sammitdən qayıdarkən özünə və digər liderlərə belə silahlar təqdim edildiyini görüb.
Hədiyyələr qırmızı qutularda təqdim edilib və silahların ixrac nəzarətindən azad olduğunu göstərən qeydlər də əlavə olunub. Lakin bir neçə ölkənin nümayəndə heyətinin təhlükəsizlik xidmətləri üçün bu, gözlənilməz vəziyyət yaradıb.
Macarıstanın Baş naziri Peter Madyar sosial şəbəkədə üzərində adı yazılan revolverin fotosunu paylaşaraq hədiyyəni “qeyri-adi” adlandırıb.
Belçikanın Baş naziri Bart De Vever isə hədiyyənin mahiyyətini yalnız ölkəsinə qayıtdıqdan sonra öyrənib. Onun təhlükəsizlik xidməti revolveri dərhal aeroport polisinin nəzarətinə verib və silahın təhlükəsiz saxlanılması üçün tədbirlər görüb.
Avropa Komissiyasının Prezidenti Ursula fon der Lyayenin də belə hədiyyə aldığı, lakin silahın sonradan istismardan çıxarılaraq hərbi muzeyə bağışlanacağı bildirilib.
Polşa Prezidenti Karol Navrotskiyə təqdim olunan revolver də təhlükəsizlik prosedurlarına uyğun şəkildə qəbul edilib. Polşa tərəfi əvvəlki insidentləri nəzərə alaraq ehtiyatlı davranıb. 2022-ci ildə Polşa polis rəisinin Ukraynadan hədiyyə kimi aldığı tank əleyhinə qumbaraatan onun kabinetində partlamışdı.
Bəzi liderlər isə hədiyyələri Türkiyədə saxlayıblar. Böyük Britaniyanın Baş naziri Kir Starmer, Almaniya kansleri Fridrix Merts və Niderlandın Baş naziri Rob Jettenə aid revolverlərin Ankarada qaldığı bildirilir. Kanada Baş naziri Mark Karninin isə silahı ölkəsinə apardığı, lakin güllələri Türkiyədə saxladığı qeyd olunur.
Mütəxəssislər bildirirlər ki, işlək odlu silahların ölkələr arasında daşınması ciddi hüquqi və təhlükəsizlik prosedurları tələb edir.
NATO sammitinin əsas gündəmində Ukrayna, İran və ABŞ Prezidenti Donald Trampla bağlı məsələlər olsa da, Ərdoğanın seçdiyi hədiyyə bir sıra nümayəndə heyətləri üçün gözlənilməz mövzuya çevrilib.
Türkiyə Prezidenti Administrasiyası isə hədiyyələrin seçimi ilə bağlı açıqlama verməyib.