Le Monde: Bolqarıstanın baş naziri Ukrayna mövqeyinə görə Aİ-nin diqqət mərkəzindədir

1xeber.media xəbər verir ki, Le Monde nəşrinin mənbələrə istinadən yaydığı məlumata görə, Bolqarıstanın baş naziri Rosen Jelyazkovun Ukrayna məsələsində tutduğu mövqe səbəbindən Avropa İttifaqı tərəfindən yaxından izlənildiyi iddia olunur.

Nəşrin yazdığına görə, hazırda Bolqarıstan hökumətinin rəhbəri Aİ-də "müşahidə altında" hesab edilir.

Bununla yanaşı, məqalədə qeyd olunur ki, Brüsseldə Bolqarıstanla bağlı ciddi narahatlıq yoxdur. Aİ-də hesab edirlər ki, ölkə İttifaqla münasibətlərini pozacaq addımlar atacaq vəziyyətdə deyil.

Bundan əvvəl Bolqarıstanın baş naziri ölkəsinin artıq Ukraynaya maliyyə və hərbi dəstəyin davam etdirilməsini müdafiə edən "İstəklilər koalisiyası"nın fəaliyyətində iştirak etməyəcəyini bəyan etmişdi. O bildirmişdi ki, münaqişənin həlli onun hərbi vasitələrlə uzadılmasında deyil, qətiyyətli diplomatik səylərdədir.

Qeyd edək ki, Le Monde xəbərində söhbət Bolqarıstan rəhbərliyinə münasibətlə bağlı diplomatik mənbələrin iddialarından gedir. Avropa İttifaqı tərəfindən bu məsələ ilə bağlı rəsmi açıqlama verilməyib.