Altı rus milyarderinin yaxtaları Türkiyə sahillərində toplandı − Putinin “Viktoriya”sı da oradadır

Altı rus milyarderinin yaxtaları Türkiyənin Bodrum kurort şəhəri yaxınlığında toplaşıb.

1xeber.media  xəbər verir ki, bu barədə “Verstka” məlumat yayıb.
Daha əvvəl Vladimir Putinlə əlaqəli olan Viktoriya yaxtası da ora çatmışdı.
Nəşrin məlumatına görə, Roman Abramoviç, Oleq Deripaska, VTB-nin baş direktoru Andrey Kostin və “Lukoil”in təsisçisi Vaqit Ələkbərova məxsus gəmilər hazırda Türkiyənin cənub və cənub-qərb sahillərində lövbər salıb.
Həmçinin yaxınlıqda gümüş və qızıl mədən şirkəti “Polymetal”ın təsisçisi Aleksandr Nesisin və Ural Mədən və Metallurgiya Şirkətinin həmtəsisçisi və prezidenti İskəndər Mahmudovun yaxtaları da var.
Qeyd edək ki, jurnalistlər 71 metrlik “Viktoriya” yaxtasını 2023-cü ilin noyabr ayında aşkar ediblər. Məlumata görə, yaxta Putinin yaxın dostu Gennadi Timçenkoya məxsus şirkətə qeydiyyatdan keçib. Bu arada, yaxtanın özü Rusiya prezidenti və onun ətrafındakılar tərəfindən istifadə olunur.
Nəşrin məlumatına görə, “Viktoriya” daimi olaraq Soçidə yerləşir. İyun ayının sonunda o, Krasnodar diyarının sahillərindən çıxaraq Bodruma doğru yola düşüb. Çox keçməmiş, Putinin digər yaxtası olan “Graceful” (müharibə başladıqdan sonra “Kosatka” adlandırılıb) Danimarka sahillərində aşkar edilib. Hazırda o, Murmansk yaxınlığında yerləşən Severomorsk limanında yerləşir.