Dövlət Dumasında FTB rəhbərinin Rusiyaya səfərinin mümkün məqsədləri açıqlanıb

Jurova "Lenta.ru"-ya açıqlamasında Rusiya və ABŞ arasında qlobal və kibertəhlükəsizlik də daxil olmaqla bir sıra mühüm məsələlər üzrə dialoqun davam etdiyini qeyd edib.

Daha əvvəl FTB rəhbəri Kəş Patelin oktyabrın ortalarında Rusiyaya səfər etməyi planlaşdırdığı barədə məlumat yayılmışdı. Bildirilirdi ki, o, Moskva və Sankt-Peterburqda görüşlər keçirəcək.

Deputatın sözlərinə görə, səfərin əsas mövzularından biri kibertəhlükəsizlik və ümumi təhlükəsizlik məsələləri ola bilər. O vurğulayıb ki, iki ölkə arasında fikir ayrılıqları olsa da, qlobal təhlükələrin qarşısının alınması istiqamətində ortaq maraqlar mövcuddur.

"Bu, yalnız amerikalılara və ya ruslara deyil, hamıya zərər vuran qlobal hakerlərlə mübarizədir. Elə məsələlər var ki, onları birlikdə həll etmək lazımdır", – deyə Jurova bildirib.

O, həmçinin oktyabrda planlaşdırılan səfərin ABŞ siyasi mədəniyyəti baxımından qeyri-adi olmadığını qeyd edib.

Bundan əvvəl Kəş Patel Rusiyanın ABŞ rəsmilərinin və hərbçilərinin Signal messencerindəki hesablarına kiberhücumlar həyata keçirdiyini iddia etmişdi.

Qeyd: Xəbərdə yer alan iddialar tərəflərin açıqlamalarına əsaslanır və müstəqil şəkildə təsdiqlənməyib.