Rusiya Müdafiə Nazirliyi üç yaşayış məntəqəsinin nəzarətə götürüldüyünü açıqlayıb

1xeber.media xəbər verir ki, nazirliyin məlumatına görə, söhbət Sumı vilayətindəki Moqritsa və Malaya Slobodka, həmçinin Xarkov vilayətində yerləşən Yurçenkovo kəndlərindən gedir.

Bildirilib ki, həmin yaşayış məntəqələri uğrunda döyüşləri Rusiya ordusunun “Şimal” qoşun qruplaşmasının bölmələri aparıb.

Nazirliyin açıqlamasında qeyd olunub ki, “aktiv döyüş əməliyyatları nəticəsində bu yaşayış məntəqələri üzərində nəzarət təmin edilib”.

Rusiya Müdafiə Nazirliyi həmçinin iddia edib ki, son sutka ərzində “Şimal” qruplaşmasının məsuliyyət zonasında Ukrayna Silahlı Qüvvələri 195 hərbçi, iki zirehli döyüş maşını və dörd avtomobil itirib.

Bundan əvvəl Rusiya tərəfi Donetsk vilayətində yerləşən Krasnoyarskoye qəsəbəsinin də nəzarətə götürüldüyünü və həmin istiqamətdə Ukrayna qüvvələrinin xeyli canlı qüvvə və texnika itkisi verdiyini açıqlamışdı.

Qeyd edək ki, bu məlumatlar Rusiya Müdafiə Nazirliyinin açıqlamasına əsaslanır və müstəqil mənbələr tərəfindən təsdiqlənməyib. Ukrayna tərəfi hadisələrlə bağlı fərqli məlumat təqdim edə bilər.