Rusiya MN: Son sutkada 712 Ukrayna PUA-sı məhv edilib

1xeber.media xəbər verir ki, bu barədə nazirliyin gündəlik brifinqində məlumat verilib.

Açıqlamaya əsasən, Rusiya HHM vasitələri həmçinin 13 idarəolunan aviasiya bombasını və ABŞ istehsalı olan HIMARS yaylım atəşli reaktiv sisteminə məxsus iki raketi məhv edib.

Rusiya Müdafiə Nazirliyi əlavə edib ki, xüsusi hərbi əməliyyat başlayandan bəri ümumilikdə 673 təyyarə, 284 helikopter, 192 611 pilotsuz uçuş aparatı, 668 zenit-raket kompleksi, 30 370 tank və digər zirehli döyüş texnikası, 1 766 reaktiv yaylım atəş sistemi, 35 951 artilleriya qurğusu və minaatan, eləcə də 67 842 xüsusi hərbi avtomobil texnikası məhv edilib.

Nazirliyin məlumatına görə, iyulun 30-na keçən gecə Rusiya ərazisi üzərində də 258 Ukrayna PUA-sı vurulub. Hücumların Penza, Tambov, Voronej vilayətləri, həmçinin Krasnodar diyarı və Adıgey Respublikasını əhatə etdiyi bildirilib.

Qeyd edək ki, bu məlumatlar Rusiya Müdafiə Nazirliyinin açıqlamasına əsaslanır və müstəqil mənbələr tərəfindən təsdiqlənməyib. Ukrayna tərəfi bu rəqəmlərlə bağlı fərqli məlumat təqdim edə bilər.