ABŞ-da Odessa ilə bağlı iddia səsləndirilib

1xeber.media xəbər verir ki, ABŞ Mərkəzi Kəşfiyyat İdarəsinin (CIA) keçmiş analitiki Larri Conson Rusiyanın Odessanı və digər Qara dəniz limanlarını nəzarətə götürmədən də Ukraynaya təsir imkanlarını saxlaya biləcəyini iddia edib.

O, Dialogue Works YouTube kanalına müsahibəsində bildirib ki, bunun üçün əsas məqsəd dəniz və logistika marşrutlarını məhdudlaşdırmaqdır.

Consonun sözlərinə görə, Ukraynaya giriş və çıxış yollarının bağlanması ölkənin logistik imkanlarına ciddi təsir göstərə bilər. O, Nikolayev istiqamətində də oxşar vəziyyətin müşahidə olunduğunu iddia edib.

Bundan əvvəl Rusiya Müdafiə Nazirliyi Odessa və Nikolayevdə hərbi hədəflərə zərbələr endirildiyini açıqlamışdı. Nazirliyin məlumatına görə, Odessa limanında Ukrayna Silahlı Qüvvələri üçün nəzərdə tutulan yanacaq-sürtkü materialları saxlanılan rezervuarlar vurulub.

Qeyd edək ki, müharibə şəraitində tərəflərin səsləndirdiyi hərbi məlumat və iddiaları müstəqil mənbələr vasitəsilə operativ şəkildə təsdiqləmək hər zaman mümkün olmur.