Rusiyanın bir regionunda dron hücumu nəticəsində anbar kompleksi yanıb

1xeber.media xəbər verir ki, Ukrayna Silahlı Qüvvələrinin (VSU) pilotsuz uçuş aparatları (PUA) Vladimir vilayətinin Sobinski rayonunda yerləşən anbar kompleksinə hücum edib.

Regionun qubernatoru Aleksandr Avdeyev rəsmi Telegram kanalında bildirib ki, hücumdan sonra ərazidə yanğın başlayıb.

Qubernatorun sözlərinə görə, hadisə yerində dağıntılar var və bütün operativ xidmətlər ərazidə işləyir. İnsanlar təhlükəsizlik məqsədilə təxliyə olunub. Hazırda xəsarət alanlarla bağlı məlumat verilməyib.

Məlumata əsasən, saat 07:50 vəziyyətinə görə Vladimir vilayətində pilotsuz uçuş aparatları təhlükəsi davam edib. Yerli hakimiyyət sakinlərə ehtiyat tədbirlərinə əməl etməyi tövsiyə edib.

Bundan əvvəl Rusiya tərəfi Ukrayna PUA-larının Belqorod vilayətində uşaq meydançası yaxınlığına zərbə endirdiyini açıqlamışdı. Məlumata görə, hadisə nəticəsində 13 yaşlı qız həlak olub, daha iki uşaq orta ağır vəziyyətdə xəstəxanaya yerləşdirilib.

Qeyd edək ki, hərbi əməliyyatlarla bağlı tərəflərin açıqladığı məlumatları müstəqil mənbələr vasitəsilə operativ şəkildə təsdiqləmək həmişə mümkün olmur.