Ukraynaya gecə zərbəsinin detalları açıqlandı

Avqustun 8-nə keçən gecə Rusiya Silahlı Qüvvələrinin Ukrayna ərazisinə raket və PUA zərbələri endirdiyi bildirilir. Ukrayna tərəfinin məlumatına görə, hücum zamanı altı "İsgəndər-M" ballistik raketi, S-400 raketləri və müxtəlif tipli pilotsuz uçuş aparatlarından istifadə olunub.

1xeber.media xəbər verir ki, Ukrayna Hərbi Hava Qüvvələrinin məlumatına əsasən, 12 ərazidə raket və 13 zərbə PUA-sının hədəfə çatdığı, daha 7 ərazidə isə raket qalıqlarının düşdüyü qeydə alınıb. Zərbələrin konkret hansı obyektlərə endirildiyi açıqlanmayıb.

Ukrayna KİV-lərinin yazdığına görə, hava hücumundan müdafiə qüvvələri gecə ərzində heç bir ballistik raketi məhv edə bilməyib. Bu qənaət Ukrayna hərbçilərinin yaydığı hesabatda ballistik raketlərin uğurlu ələ keçirilməsi barədə məlumatın olmamasına əsaslanır.

Rusiya hərbi müxbirlərinin Telegram kanallarında yayılan məlumatlarda isə "İsgəndər-M" raketləri və "Geran" PUA-larının Ukraynanın hərbi, yanacaq və logistika infrastrukturu obyektlərini vurduğu iddia edilir. Zərbələrin Kiyev və Kiyev vilayəti, Dnepropetrovsk, Nikolayev, Xarkov, Sumı və Çerniqov vilayətlərinə endirildiyi bildirilir.

Qeyd edək ki, avqustun 5-də də Ukrayna hərbçilərinin Rusiyanın gecə zərbələri zamanı heç bir raketi məhv edə bilmədiyi barədə məlumat yayılmışdı.