Binəqədi Gənclər Evində Beynəlxalq Gənclər Günü qeyd olunub
Beynəlxalq Gənclər Günü münasibətilə Binəqədi Gənclər Evinin təşkilatçılığı ilə gəncləri bir araya gətirən geniş tədbir proqramı keçirilib.
1xeber.media xəbər verir ki,tədbirin əsas məqsədi dövlət gənclər siyasətinin prioritetlərinə uyğun olaraq gənclərin ictimai fəallığının artırılması, onların təşəbbüslərinin dəstəklənməsi, şəxsi və peşəkar inkişafına töhfə verilməsi, eləcə də fəaliyyəti və təşəbbüskarlığı ilə fərqlənən gənclərin təşviq edilməsi olub.
Tədbirdə çıxışlar zamanı Azərbaycanda həyata keçirilən dövlət gənclər siyasətinin əsas istiqamətlərindən, gənclərin təhsil, inkişaf və özünüreallaşdırma imkanlarının genişləndirilməsindən bəhs olunub. Qeyd edilib ki, Ümummilli Lider Heydər Əliyev tərəfindən əsası qoyulan dövlət gənclər siyasəti Azərbaycan Respublikasının Prezidenti İlham Əliyevin rəhbərliyi ilə uğurla və ardıcıl şəkildə davam etdirilir. Gənclərə göstərilən diqqət və etimad onların ölkənin ictimai, elmi, mədəni və idman həyatında fəal iştirakına geniş imkanlar yaradır.
Beynəlxalq Gənclər Gününə həsr olunan tədbir iki hissədən ibarət olub. Proqramın ilk hissəsində Binəqədi Gənclər Evində Binəqədi Rayon Gənclər və İdman İdarəsinin tərəfdaşlığı ilə dəyirmi masa keçirilib.
Dəyirmi masada ictimai fəaliyyəti, təşəbbüskarlığı və nailiyyətləri ilə fərqlənən gənclər iştirak ediblər. Görüş zamanı gənclərin inkişaf imkanları, gələcək hədəfləri, cəmiyyətdə rolu və yeni təşəbbüsləri ətrafında fikir mübadiləsi aparılıb. Eyni zamanda, dövlət tərəfindən gənclər üçün yaradılan imkanlar və müasir Azərbaycan gəncliyinin qarşısında açılan yeni perspektivlər barədə müzakirələr keçirilib.
Tədbir çərçivəsində Beynəlxalq Gənclər Gününə həsr olunmuş xüsusi videoçarx nümayiş etdirilib, fəallığı, təşəbbüskarlığı və fəaliyyəti ilə seçilən gənclərə xüsusi hədiyyələr təqdim olunub. Dəyirmi masanın sonunda iştirakçılar üçün çay və kofe fasiləsi təşkil edilib.
Tədbirin ikinci hissəsi Binəqədi Gənclər Evinin açıq ərazisində və stadionunda musiqili-əyləncəli proqramla davam edib. Açıq hava proqramında gənclər üçün müxtəlif interaktiv oyunlar, müsabiqələr və əyləncəli fəaliyyətlər təşkil olunub. DJ proqramı və canlı musiqi çıxışları tədbir iştirakçıları üçün dinamik və pozitiv atmosfer yaradıb.
Musiqili proqramda Nirvana Band da çıxış edib. Qrupun canlı ifaları gənclər tərəfindən maraqla qarşılanıb və tədbirin əyləncəli atmosferinə xüsusi rəng qatıb.
Bununla yanaşı, tədbir məkanında gənclər üçün xüsusi foto və interaktiv zonalar yaradılıb. İştirakçılar həmin zonalarda xatirə fotoları çəkdirib, müxtəlif interaktiv fəaliyyətlərdə iştirak ediblər.
Beləliklə, Binəqədi Gənclər Evində keçirilən tədbir Beynəlxalq Gənclər Gününü həm rəsmi və motivasiya xarakterli görüş, həm də musiqili-əyləncəli proqram formatında qeyd etməyə imkan yaradıb. Tədbir gənclərin bir araya gəlməsi, fikir və təcrübə mübadiləsi aparması, yeni əlaqələr qurması və əlamətdar günü birlikdə qeyd etməsi baxımından əhəmiyyətli platforma olub.
Binəqədi Gənclər Evi bundan sonra da dövlət gənclər siyasətinin əsas istiqamətlərini rəhbər tutaraq gənclərin inkişafına, onların potensialının üzə çıxarılmasına, təşəbbüslərinin dəstəklənməsinə və ictimai həyatda fəal iştirakının təşviqinə yönəlmiş layihə və tədbirlərin həyata keçirilməsini davam etdirəcək.
