Üç dəqiqəyə oğurlanan 9 milyon avroluq əsərlər tapıldı

İtaliya polisi Sezan, Renuar və Matis kimi dünya şöhrətli rəssamlara məxsus, ümumi dəyəri 9 milyon avrodan çox olan üç əsəri geri qaytarıb.

1xeber.media Reuters⁠ agentliyinə istinadən məlumatına görə, tablolar Parma şəhərində yerləşən mənzillərdən birində aşkarlanıb. Hadisə ilə əlaqədar doqquz Moldova vətəndaşı barəsində araşdırma aparılır.

Söhbət Pol Sezanın “Albalı ilə fincan və boşqab”, Pyer-Ogüst Renuarın “Balıqlar” və Anri Matisin “Terrasda odaliska” əsərlərindən gedir.

Qiymətli tablolar martın 22-dən 23-nə keçən gecə Parma yaxınlığındakı Manyani-Rokka Fondu Muzeyindən oğurlanmışdı. Təhlükəsizlik kameralarının qeydə aldığı görüntülərə əsasən, maskalı iki nəfər pəncərədən binaya daxil olaraq əsərləri divardan götürüb.