BMT: 50 milyon dollarlıq girov pulu “Əl-Qaidə”nin hücumlarına sərf olunub

2025-ci ilin sonunda Malidə girov götürülən şəxsin azad edilməsi üçün ödənildiyi bildirilən təxminən 50 milyon dollar “Əl-Qaidə” ilə əlaqəli silahlı qrupların fəaliyyətinin maliyyələşdirilməsinə yönəlib.

1xeber.media “Meydan Bizim” ə istinadən xəbər verir ki, bu barədə BMT ekspertlərinin yeni hesabatında məlumat verilib.

Hesabata əsasən, vəsaitin böyük hissəsi Sahel bölgəsində fəaliyyət göstərən “Camaat Nüsrət əl-İslam vəl-Müslimin” koalisiyasının dəstələri arasında bölüşdürülüb. Pulun Malidə silahlı əməliyyatların genişləndirilməsində mühüm rol oynadığı qeyd olunur.

BMT sənədində girovun və ödənişi edən tərəfin adı açıqlanmayıb. Reuters⁠ agentliyinin üç regional mənbəsi vəsaitin BƏƏ tərəfindən ödənildiyini bildirib. Lakin Əbu-Dabi bu məlumatı təsdiqləməyib.

Hesabatda pulun bir hissəsinin Şimali Afrikadakı “İslam Məğribində Əl-Qaidə” qoluna, oradan isə təşkilatın mərkəzi rəhbərliyinə və Yəməndəki qoluna ötürüldüyü bildirilir.

JNIM-in Sahel bölgəsində 7–8 min silahlısının olduğu, onların təxminən yarısının Malidə fəaliyyət göstərdiyi qeyd edilir.