Şahzadə Harri kral ailəsindən üzr gözləyir

1xeber.media xəbər verir ki, “The Mirror” nəşrinin məlumatına görə, Şahzadə Harri Böyük Britaniyaya qayıtmasına baxmayaraq, kral ailəsinin bəzi üzvlərinə qarşı narazılığını qoruyub saxlayır və onlardan üzr gözləyir.

Məlumata görə, Sasseks hersoqunun ölkəyə səfəri ailədaxili münaqişənin başa çatdığı anlamına gəlmir. Harri Kral III Çarlzın ətrafındakı bəzi şəxslərdən də narazıdır. O, 2025-ci ildə atasının ətrafındakı “boz kostyumlu insanlar”ı tənqid edərək, saray əməkdaşlarını kral ilə barışmasına mane olmaqda ittiham etmişdi.

“The Mirror” yazır ki, Harri özü açıq şəkildə üzr istəmək niyyətində deyil. Bununla yanaşı, onun nümayəndələri təhlükəsizliyinin təmin edilməsi məsələsi ilə bağlı Böyük Britaniyanın Daxili İşlər Nazirliyinə müraciət ediblər.

Daha əvvəl Harri və həyat yoldaşı Meqan Marklın III Çarlzdan illərdir davam edən qarşıdurma zamanı ona yaşatdıqları ağrıya görə açıq şəkildə üzr istəmək niyyətində olduqları bildirilmişdi. Cütlük 2020-ci ildə ABŞ-a köçüb və son altı ili Kaliforniyada keçirib.