Tramp Sıluanovun ABŞ səfərinə münasibət bildirdi

ABŞ Prezidenti Donald Tramp Rusiyanın maliyyə naziri Anton Sıluanovun G20 ölkələrinin maliyyə nazirləri və mərkəzi bank rəhbərlərinin görüşündə iştirak etmək üçün ABŞ-a səfərinə münasibət bildirib.

1xeber.media xəbər verir ki, Tramp Sıluanovun ABŞ-a gəlməsi ilə bağlı jurnalistlərin sualını cavablandırarkən, Rusiya ilə münasibətlərin davam etdirilməsinin mümkün nəticələr verəcəyini deyib.

“Baxarıq, bəlkə də nəsə alınar. Biz hamı ilə yaxşı münasibətlər qurmağı xoşlayırıq”, – deyə Tramp bildirib.

Sıluanov ABŞ-ın maliyyə naziri Skott Bessentlə görüşüb. Tərəflərin Ukrayna ilə bağlı Trampın 28 maddəlik sülh planını müzakirə etdiyi bildirilib.

Almaniyadan narazılıq

Almaniyanın maliyyə naziri Lars Klinqbayl Sıluanovun ABŞ-da isti qarşılanmasından narazılığını ifadə edib. O, Vaşinqtonun bu addımını “narahatedici siqnal” kimi qiymətləndirib.

Klinqbayl bildirib ki, ABŞ-ın Sıluanovu adi qonaq kimi qəbul etməməsini və Rusiyaya qarşı daha aydın mövqe nümayiş etdirməsini üstün tutardı.

Bundan əlavə, Avropanın maliyyə nazirləri Sıluanovla G20 sammitində birgə foto çəkdirməkdən imtina ediblər.