Kiyev Budapeştin qərarına sərt reaksiya verdi

1xeber.media xəbər verir ki, Ukraynanın xarici işlər naziri Andrey Sibiqa Macarıstanın Kiyevin təşəbbüsü ilə yaradılan “Karpat səkkizliyi”nə qoşulmaması və Ukrayna üçün yanacaq anbarlarının Macarıstan ərazisində tikintisinə icazə verməməsi ilə bağlı açıqlama verib.

Sibiqa sosial şəbəkədə Macarıstanın mövqeyinin Ukraynada təəccüb doğurduğunu bildirib. Nazir Budapeştin “Karpat səkkizliyi” təşəbbüsünə qoşulmaqdan imtina etməsinin səbəblərinin ona məlum olmadığını deyib. Macarıstanın baş naziri Peter Magyar isə ölkəsinin bu təşəbbüsə dəvət aldığını, lakin qoşulmadığını bildirib.

Ukrayna tərəfi həmçinin Macarıstanda yanacaq saxlama obyektlərinin yaradılmasını planlaşdırırdı. Bununla bağlı Ukraynanın “Naftoqaz” şirkəti Macarıstanın MOL şirkəti ilə memorandum imzalamışdı. Lakin Magyar layihənin həyata keçirilməsinə icazə verməyəcəyini açıqlayıb.

Sibiqa hesab edir ki, siyasi amillərin praqmatik iqtisadi əməkdaşlığa müdaxiləsi müsbət nəticə vermir. O, Budapeştdən gələn son açıqlamaların Kiyevdə çaşqınlıq yaratdığını bildirib.

Macarıstanın baş naziri isə yanacaq anbarı layihəsi ilə bağlı danışıqların hökumətin əvvəlcədən razılığı olmadan aparıldığını və layihənin onun rəhbərlik etdiyi hökumət dövründə həyata keçirilməyəcəyini deyib.