Вернуться назад Распечатать

Prezident İlham Əliyev: "İstehsal zəncirinin tam yaradılması ölkə iqtisadiyyatını gücləndirəcək"

Azərbaycan Respublikasının Prezidenti İlham Əliyevin sədrliyi ilə “Azərbaycan Respublikasında 2027–2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı”na həsr olunmuş mühüm müşavirə keçirilib.

1xeber.media xəbər verir ki,müşavirədə çıxış edən dövlət başçısı ölkənin qeyri-neft iqtisadiyyatının və ağır sənayesinin gələcək inkişaf yol xəritəsini müəyyənləşdirib. Prezident regional və qlobal iqtisadi çağırışlar fonunda daxili resursların potensialından maksimum istifadə edilməsinin vacibliyini vurğulayıb.
Ölkənin sənaye potensialının artırılması rəqabətqabiliyyətli yerli istehsalın qurulmasından keçir. Dövlət başçısı öz çıxışında bu strateji hədəfi xüsusilə diqqətə çatdırıb:
"Bizim təbii resurslarımızın işlənməsi və onlardan səmərəli şəkildə istifadə olunması, eyni zamanda, istehsal zəncirinin tam yaradılması ölkə iqtisadiyyatını gücləndirəcək".
Prezident qeyd edib ki, xammalın sadəcə hasil olunması deyil, onun ölkə daxilində tam emal mərhələsindən keçərək son hazır məhsul formasına gətirilməsi iqtisadiyyata daha yüksək əlavə dəyər qazandıracaq. Bu yanaşma idxaldan asılılığı minimuma endirməklə yanaşı, Azərbaycanın ixrac potensialını da əhəmiyyətli dərəcədə genişləndirəcək.
Müşavirədə həmçinin yeni qəbul olunacaq Dövlət Proqramının icrası nəticəsində sənaye sahəsində minlərlə yeni iş yerinin açılacağı, Qarabağ və Şərqi Zəngəzur daxil olmaqla bölgələrin iqtisadi fəallığının artırılacağı bildirilib. Sonda dövlət başçısı aidiyyatı qurumlara proqramın effektiv icrası və şəffaflığın təmin edilməsi ilə bağlı konkret tapşırıqlar verib.