Zelenski və Makronun görüşü tənqid edildi

1xeber.media xəbər verir ki, Ukrayna Prezidenti Volodimir Zelenski ilə Fransa Prezidenti Emmanuel Makronun Nyu-Yorkda keçirilən görüşü irlandiyalı jurnalist Çey Bouz tərəfindən tənqid olunub.

Bouz sosial şəbəkə hesabında görüş zamanı iki liderin gülümsəməsinə diqqət çəkib. Jurnalist bildirib ki, söhbətin əsas mövzularından biri müharibə və insanların həlak olması olduğu halda, Zelenski və Makronun görüş zamanı gülümsəməsi diqqətçəkəndir.

Zelenski və Makron sentyabrın 21-də BMT Baş Assambleyasının yüksək səviyyəli həftəsi çərçivəsində Nyu-Yorkda görüşüblər. Tərəflər Ukraynanın enerji infrastrukturu və ölkənin hava hücumundan müdafiəsinin gücləndirilməsi məsələlərini müzakirə ediblər.

Görüşdən əvvəl Makron ABŞ Prezidenti Donald Trampla da danışıqlar aparıb. Fransa lideri Ukrayna və Rusiya arasında enerji və mülki infrastruktura zərbələrin dayandırılmasına dair moratorium imkanını müzakirə etdiyini bildirib.

Zelenski və Makronun görüşü ilə bağlı Rusiyanın XİN-in xüsusi tapşırıqlar üzrə səfiri Rodion Miroşnik də sosial şəbəkədə istehzalı şərh verib.