Yaponiya Rusiyaya qarşı yeni sanksiyalar tətbiq etməyi planlaşdırır

Yaponiya hakimiyyəti Rusiyaya qarşı növbəti sanksiyalar paketinin tətbiqi imkanını nəzərdən keçirir.

1xeber.media xəbər verir ki, bu barədə “Yomiuri” qəzeti hökumətdəki mənbələrə istinadən məlumat yayıb.

Nəşrin məlumatına görə, Avropa İttifaqına üzv ölkələrin son dövrlərdə Rusiyaya qarşı sanksiya təzyiqini gücləndirməsi fonunda Tokio da analoji addımlara qoşula bilər. Yeni məhdudiyyətlərin əsas hədəflərindən biri “kölgə donanması” adlandırılan gəmilər ola bilər.

Bundan əlavə, Yaponiyanın ixrac məhdudiyyətlərinin genişləndirilməsi və ixrac nəzarətinin sərtləşdirilməsi imkanlarını nəzərdən keçirdiyi bildirilir.

Qəzet qeyd edir ki, sanksiyaların mümkün tətbiqi Rusiya Prezidenti Vladimir Putinin İturup adasına səfəri ilə də əlaqələndirilir. Bu səfər Tokio tərəfindən kəskin reaksiya ilə qarşılanıb.

Rusiyanın Tokiodakı səfiri Nikolay Nozdryov Yaponiyanın reaksiyasını əsassız demarş adlandırıb və ölkənin xarici işlər nazirinə Cənubi Kuril adalarının Rusiyanın ayrılmaz hissəsi olduğunu bildirib.

Yaponiya hökuməti sonuncu dəfə 2025-ci il sentyabrın 12-də, əvvəlki baş nazir Şiqeru İşibanın rəhbərlik etdiyi hökumət dövründə Rusiyaya qarşı sanksiyalar tətbiq edib. Hazırkı baş nazir Sanae Takaçinin hökuməti dövründə isə indiyədək belə tədbirlər görülməyib.

Bununla yanaşı, avqustun sonunda və sentyabrda Yaponiyanın aparıcı media qurumları tərəfindən keçirilmiş iki ayrı rəy sorğusunun nəticələri əhalinin əksəriyyətinin Moskva ilə münasibətlərdə sanksiyalardan daha çox dialoqa üstünlük verdiyini göstərib.

“Sankei” qəzeti və “Fuci” telekanalının, eləcə də “Nikkei” qəzetinin keçirdiyi sorğularda respondentlərin yarıdan çoxu hökumətin Rusiya ilə bağlı daha çevik mövqe tutmasının və Cənubi Kuril adaları məsələsi fonunda sanksiyaların sərtləşdirilməsi əvəzinə dialoqa çağırış etməsinin tərəfdarı olub.

Yaponiya 2022-ci ildən etibarən Rusiyaya qarşı bir neçə sanksiya paketi tətbiq edib. Bu tədbirlər iki ölkə arasında əlaqələrin əhəmiyyətli dərəcədə məhdudlaşmasına səbəb olub.