Çin şirkəti Almaniyanın nəhəng elektronika şəbəkəsini almağa yaxınlaşdı

1xeber.media xəbər verir ki, Çinin “JD.com” şirkətinin Almaniyanın “Ceconomy” elektronika pərakəndəçisi ilə bağlı 2,5 milyard dollarlıq təklifinin Avropa İttifaqından təsdiq alacağı gözlənilir.

Reuters-in yazdığına görə, “JD.com” Avropa Komissiyasının rəqabətlə bağlı narahatlıqlarını aradan qaldırmaq üçün təklif etdiyi şərtlərə dəyişikliklər edib. Bunun ardınca sövdələşmənin təsdiqlənməsi ehtimalı yüksəlib.

“Ceconomy” Avropanın elektronika pərakəndə sektorunda tanınmış şirkətlərdən biridir və “MediaMarkt” və “Saturn” kimi mağaza şəbəkələrinə sahibdir.

Avropa Komissiyası sövdələşməni xarici subsidiyalarla bağlı qaydalar çərçivəsində araşdırır. Bu mexanizm Aİ-yə xarici dövlətlərin şirkətlərə verdiyi mümkün maliyyə dəstəyinin Avropa bazarında rəqabətə təsirini qiymətləndirmək imkanı verir.

Çin şirkətlərinin Avropa bazarında böyük aktivlər əldə etməsi son illərdə Brüsselin xüsusi diqqət yetirdiyi məsələlərdən birinə çevrilib. “JD.com”un “Ceconomy”ni almaq planı da bu baxımdan Avropa tənzimləyicilərinin nəzarətindən keçən iri sövdələşmələrdən biridir.