Kiyevdə körpüyə zərbə endirildiyi bildirildi

1xeber.media xəbər verir ki, Rusiya Müdafiə Nazirliyi oktyabrın 3-nə keçən gecə Kiyevdə Dnepr çayı üzərindən keçən Şimal avtomobil körpüsünə pilotsuz uçuş aparatları ilə zərbə endirildiyini açıqlayıb.

Rusiya tərəfinin məlumatına görə, sözügedən körpü Ukrayna Silahlı Qüvvələrinin şəxsi heyətinin daşınması və hərbi yüklərin çatdırılması üçün istifadə olunan logistika marşrutlarından biridir.

Rusiya Müdafiə Nazirliyi həmçinin Kiyev vilayətində yerləşən Qostomel logistika mərkəzinin də vurulduğunu bildirib. Nazirliyin iddiasına əsasən, mərkəzin ərazisində Ukrayna Silahlı Qüvvələrinin təchizatı üçün nəzərdə tutulan vasitələr saxlanılırdı.

Ukrayna tərəfi və müstəqil mənbələrdən zərbələrin nəticələri ilə bağlı əlavə məlumat verilməyib. Rusiya Müdafiə Nazirliyinin açıqladığı məlumatın digər mənbələr tərəfindən müstəqil şəkildə təsdiqlənib-təsdiqlənmədiyi dəqiqləşdirilməyib.