Nəqliyyat Mərkəzi Asiya dövlətləri ilə Azərbaycan arasında əməkdaşlığın əsas sahələrindən biridir

Oktyabrın 8-də Türkmənistanın Türkmənbaşı şəhərində keçirilən Azərbaycan və Mərkəzi Asiya Dövlət Başçılarının 8-ci Məşvərət görüşündə çıxış edən Azərbaycan Respublikasının Prezidenti İlham Əliyev regionlararası nəqliyyat və logistika əlaqələrinin strateji əhəmiyyətini xüsusi vurğulayıb.

Dövlətimizin başçısı bəyan edib ki, nəqliyyat sektoru Mərkəzi Asiya dövlətləri ilə Azərbaycan arasında əməkdaşlığın ən aparıcı və fundamental istiqamətlərindən birinə çevrilmişdir. Xəzər dənizinin ölkələrimiz arasında qarşılıqlı nəqliyyat əlaqələrində getdikcə daha vacib və mərkəzi rol oynadığını bildirən Prezident İlham Əliyev qeyd edib: “Xəzərin hər iki sahilindəki nəqliyyat infrastrukturu Mərkəzi Asiyanı Azərbaycanla və daha sonra beynəlxalq bazarlarla birləşdirmək üçün çox vacibdir”.

Prezident, həmçinin qarşıda duran ortaq məqsədin bu nəqliyyat marşrutlarını, xüsusən də getdikcə əhəmiyyəti artan Orta Dəhlizi daha səmərəli və rəqabətədavamlı etmək olduğunu diqqətə çatdırıb. Statistik göstəricilərə toxunan dövlət başçısı bu marşrut üzrə tranzit yükdaşımalarının həcminin ötən il 10 faizdən çox, cari ilin ilk səkkiz ayında isə təqribən daha 20 faiz artdığını məmnunluqla ifadə edib.

Paralel olaraq, regionda rəqəmsal bağlantını gücləndirəcək "Rəqəmsal İpək Yolu" layihəsi çərçivəsində Xəzər dənizinin dibi ilə fiber-optik xətlərin çəkilişi üzrə işlərin də uğurla davam etdirildiyi bildirilib.