Samsung rekord mənfəət açıqladı – 80 milyard dollar

1xeber.media 1BUSİNESS.MEDIA-nın instagram səhifəsinə istinadən xəbər verir ki, Cənubi Koreyanın texnologiya nəhəngi “Samsung Electronics” 2026-cı ilin üçüncü rübündə tarixinin ən yüksək əməliyyat mənfəətini əldə edib.

Şirkətin ilkin hesablamalarına görə, iyul-sentyabr aylarında əməliyyat mənfəəti 107,4 trilyon vona, yəni təxminən 80,2 milyard dollara çatıb. Bu, ötən ilin eyni dövrü ilə müqayisədə 782,5 faiz artım deməkdir. Şirkətin rüblük əməliyyat mənfəəti ilk dəfə 100 trilyon vonu ötüb.

“Samsung Electronics”in üçüncü rübdə gəlirlərinin təxminən 195 trilyon von təşkil etdiyi bildirilir. Gəlirlər illik müqayisədə 127 faiz artıb.

Rekord nəticənin əsas səbəblərindən biri süni intellekt sistemləri üçün yaddaş çiplərinə tələbatın kəskin yüksəlməsidir. Yüksək ötürmə qabiliyyətinə malik HBM çiplərinə marağın artması, DRAM və NAND yaddaş çiplərinin təklifinin məhdud qalması şirkətin yarımkeçirici biznesinə ciddi gəlir gətirib.

Müqayisə üçün, “Samsung Electronics” 2025-ci ilin üçüncü rübündə 12,17 trilyon von əməliyyat mənfəəti əldə etmişdi.

Şirkət 2026-cı ilin ikinci rübündə də rekord nəticə açıqlamışdı. Həmin dövrdə gəlir 171,5 trilyon von, əməliyyat mənfəəti isə 89,5 trilyon von olmuşdu.

“Samsung Electronics” üçüncü rübün biznes istiqamətləri üzrə tam maliyyə nəticələrini oktyabrın 29-da açıqlayacaq.