Meksikada həbsxana iğtişaşı: 10 nəfər öldü

1xeber.media xəbər verir ki, Meksikanın Sinaloa ştatında yerləşən həbsxanada baş verən iğtişaş nəticəsində 10 nəfər ölüb, 16 məhbus yaralanıb.

Associated Press-in məlumatına görə, hadisə Mazatlan şəhərindəki El Castillo həbsxanasında ailə görüşləri zamanı baş verib. Ölənlərdən doqquzu məhbus, biri isə ziyarətə gələn ailə üzvüdür. Yerli KİV məhbusların qarşıdurma zamanı odlu silahlardan istifadə etdiyini yazıb.

Hadisədən sonra ordu, Milli Qvardiya, donanma və ştatın təhlükəsizlik qüvvələri həbsxanaya cəlb olunub. Rəsmilər müəssisədə nəzarətin bərpa edildiyini bildiriblər. Həbsxanada təxminən 1 800 məhbusun saxlanıldığı qeyd olunur.

Meksikada həbsxanaların həddindən artıq dolu olması, işçi çatışmazlığı və cinayətkar qrupların təsiri bu cür zorakılıq hallarının əsas səbəbləri arasında göstərilir. İğtişaşın konkret səbəbi ilə bağlı isə hələlik ətraflı məlumat açıqlanmayıb.