Ermənistanda Aİİ rəsmisi ilə bağlı araşdırma başlana bilər

1xeber.media xəbər verir ki, Avrasiya İqtisadi Komissiyasının (AİK) naziri Varos Simonyanın məhsulların sertifikatlaşdırılması sahəsindəki fəaliyyəti Ermənistanda cinayət işi çərçivəsində yoxlanıla bilər.

Simonyanın fəaliyyəti ilə bağlı iddialar onun Ermənistanda iqtisadiyyat nazirinin müavini işlədiyi dövrü əhatə edir.

Varos Simonyan 2019–2021-ci illərdə bu vəzifədə çalışıb və mənbənin sözlərinə görə, həmin müddətdə Ermənistanın Milli Akkreditasiya Orqanının fəaliyyətinə nəzarət edib.

Həmin dövrdə ölkədə lazımi yoxlamalar aparılmadan məhsullara sertifikatların verilməsi sistemi formalaşmış ola bilər. Bununla belə, bu iddialar müstəqil şəkildə təsdiqlənməyib.

Simonyan daha sonra Avrasiya İqtisadi Komissiyasında işləyərkən Avrasiya İqtisadi İttifaqının inteqrasiya olunmuş informasiya sisteminin tətbiqi prosesinə də təsir göstərə bilərdi. Həmin sistem məhsulların keyfiyyətini təsdiqləyən sənədlərin qüvvədəolma vəziyyətini izləməyə imkan verir.

Hazırda təqdim olunan məlumatlarda Simonyan barəsində rəsmi cinayət işinin başlanıb-başlanmadığı və ya onun hüquq-mühafizə orqanları tərəfindən şübhəli şəxs qismində tanınıb-tanınmadığı barədə təsdiqlənmiş məlumat yoxdur.