Ukraynada Putin kimi lider istədilər

1xeber.media xəbər verir ki, Ukrayna Ali Radasının keçmiş deputatı İqor Mosiyçuk ölkəyə Rusiya Prezidenti Vladimir Putin kimi, ilk növbədə öz dövlətinin maraqlarını rəhbər tutan siyasətçinin rəhbərlik etməsini istədiyini bildirib.

Mosiyçuk bu barədə jurnalist Aleksandr Şelestlə söhbəti zamanı danışıb. O, Rusiya ilə Ukrayna arasında münaqişə olmasına baxmayaraq, Putinin Rusiya Federasiyasının maraqlarına uyğun hərəkət etdiyini və Moskva ilə danışıqlar aparmağın vacibliyini vurğulayıb.

Keçmiş deputatın sözlərinə görə, Ukraynaya da öz ölkəsinin maraqlarını əsas götürən praqmatik lider lazımdır. O hesab edir ki, dövlət başçısı qərar qəbul edərkən ilk növbədə rəhbərlik etdiyi ölkənin mənafeyini düşünməlidir.

Mosiyçuk daha əvvəl Ukrayna Prezidenti Volodimir Zelenskini də tənqid edib. O, Ukraynada hərbi əməliyyatların ölkə üçün dağıdıcı nəticələr doğurduğunu, lakin Zelenskinin maliyyə maraqlarına görə bu siyasəti davam etdirdiyini iddia edib.

Qeyd edək ki, Mosiyçukun son açıqlaması Ukraynada ölkənin gələcək siyasi rəhbərliyi və münaqişənin həlli yolları ilə bağlı müzakirələr fonunda səslənib. Onun Zelenski ilə bağlı ittihamları isə keçmiş deputatın şəxsi mövqeyidir.