ABŞ məhkəməsi seçici siyahıları ilə bağlı administrasiyanın addımını qanunsuz saydı

1xeber.media xəbər verir ki, ABŞ-da federal hakim Donald Tramp administrasiyasının ştatlardan seçici siyahılarını əldə edərək onları immiqrasiya məlumatları ilə tutuşdurmaq cəhdini qanunsuz hesab edib. 

Reuters-in məlumatına görə, Kolumbiya dairəsi üzrə federal hakim Sparkle Sukanan Ədliyyə Nazirliyinin bu addımına qarşı qərar çıxarıb. Mübahisə noyabrda keçiriləcək aralıq seçkilər ərəfəsində seçici qeydiyyatına federal müdaxilənin genişləndirilməsi cəhdləri ilə bağlıdır.

Tramp administrasiyası seçkilərdə qanunsuz səsvermənin qarşısını almaq məqsədilə ştatlardan seçici siyahılarını tələb edib. Ədliyyə Nazirliyi bu məlumatları immiqrasiya bazası ilə müqayisə edərək seçki hüququ olmayan şəxslərin siyahılardan çıxarılmasını nəzərdə tuturdu.

Lakin iddiaçılar belə yoxlamaların ABŞ vətəndaşlığına sonradan qəbul edilmiş şəxslərin də səhvən seçici siyahılarından çıxarılması riskini yaratdığını bildiriblər. Hakim də seçkilərin idarə edilməsinin əsasən ştatların səlahiyyətinə aid olduğunu vurğulayıb.

Qərar administrasiyanın seçki sisteminə federal nəzarəti artırmaq cəhdlərinə hüquqi maneə yaradıb. Bununla belə, mübahisənin digər məhkəmə proseslərində davam etməsi mümkündür.