Cənubi Afrikada miqrantlara qarşı etirazlar zorakılığa çevrildi

1xeber.media xəbər verir ki, Cənubi Afrikanın Yohannesburq şəhərinin Soweto qəsəbəsində və Durban şəhərində miqrantlara qarşı etirazlar zorakılıqla nəticələnib. Hadisələr zamanı avtomobillər yandırılıb, xarici vətəndaşlara məxsus mağazalar talan edilib. 

Reuters-in məlumatına görə, etirazlar qaçqınların müraciətlərini qəbul edən mərkəzin fəaliyyətinə qarşı keçirilən aksiyadan sonra başlayıb. Durban şəhərində azı 14 avtomobilin yandırıldığı, bəzi obyektlərin isə qismən zərər gördüyü bildirilib.

Cənubi Afrika hökumətinin nümayəndəsi Uilyam Baloyi iğtişaşların səbəblərindən biri kimi ölkənin Konstitusiya Məhkəməsinin sığınacaq müraciətləri ilə bağlı qərarının sosial şəbəkələrdə yanlış təqdim edilməsini göstərib.

Məhkəmə qərarı ölkəyə qanunsuz daxil olan şəxslərin yalnız bu səbəbə görə sığınacaq müraciəti vermək hüququndan məhrum edilə bilməyəcəyini nəzərdə tutur. Hökumət isə bunun avtomatik olaraq qaçqın statusu və ya daimi yaşayış hüququ vermədiyini vurğulayıb.

Polis zorakılıq və əmlaka zərər vurmaqda iştirak edən şəxslərin müəyyən edilərək məsuliyyətə cəlb olunacağını bildirib. Ölkədə işsizlik və sosial bərabərsizlik fonunda miqrantlara qarşı etirazların təkrarlanması isə vəziyyətin daha da gərginləşməsi ilə bağlı narahatlıqları artırır.