İndoneziya zəlzələ xəbərdarlığı üçün yeni üsulu sınaqdan keçirir

1xeber.media xəbər verir ki, İndoneziyada zəlzələ təhlükəsi barədə əhalini daha tez məlumatlandırmaq məqsədilə məscidlərin səsgücləndiricilərindən istifadə imkanları araşdırılır.

“The Guardian” nəşrinin məlumatına görə, beşillik sınaq proqramı çərçivəsində namaz vaxtını elan etmək üçün istifadə olunan səsgücləndiricilərin zəlzələ xəbərdarlıqlarının yayılmasına kömək edib-etməyəcəyi qiymətləndirilir.

Layihənin əsas məqsədi ənənəvi rabitə və xəbərdarlıq sistemlərinin əhatə etmədiyi, məlumatın əhaliyə çatmasının çətin olduğu ərazilərdə insanları təhlükədən vaxtında xəbərdar etməkdir.

İndoneziya seysmik cəhətdən aktiv bölgədə yerləşdiyindən zəlzələlər və sunami riski ölkə üçün mühüm təhlükə olaraq qalır. Mövcud səsgücləndiricilərdən əlavə xəbərdarlıq vasitəsi kimi istifadə edilməsi geniş əhali qruplarına məlumat çatdırmaq imkanını artıra bilər.

Sınaq proqramı bu üsulun nə dərəcədə effektiv olduğunu və fövqəladə hallarda mövcud xəbərdarlıq sistemlərini necə tamamlaya biləcəyini müəyyənləşdirməlidir.