Aİ Rusiyaya qarşı 22-ci sanksiya paketini təsdiqlədi

1xeber.media xəbər verir ki, Avropa İttifaqı (Aİ) Rusiyaya qarşı 22-ci sanksiya paketini təsdiqləyib. Bu barədə Aİ-nin xarici işlər və təhlükəsizlik siyasəti üzrə ali nümayəndəsi Kaya Kallas məlumat verib.

Kallasın sözlərinə görə, Aİ-yə üzv ölkələrin xarici işlər nazirləri Rusiyanın hərbi-sənaye kompleksini hədəf alan, təxminən 1600 yeni məhdudiyyəti əhatə edən siyahını təsdiqləyiblər. O, bunu Aİ-nin sanksiya siyahısının indiyədək ən genişmiqyaslı genişləndirilməsi kimi xarakterizə edib.

Diplomat bildirib ki, yeni məhdudiyyətlərin əhəmiyyətli hissəsi ballistik raketlərin istehsal zənciri ilə əlaqəlidir. Kallasın fikrincə, yeni paket Avropanın Ukraynaya dəstək məsələsində vahid mövqeyini nümayiş etdirir.

Rusiya isə Qərbin tətbiq etdiyi sanksiyaların miqyasına diqqət çəkir. Prezident Vladimir Putin daha əvvəl Rusiyaya qarşı 30 mindən çox məhdudiyyətin tətbiq edildiyini bildirib. Onun sözlərinə görə, bu rəqəm dünyanın digər ölkələrinə qarşı tətbiq edilən məhdudiyyətlərin ümumi sayından təxminən iki dəfə çoxdur.