Süni intellekt və gen redaktəsi birləşdi: 400 il əvvəl yox olan dodo quşu geri qayıdır!

1xeber.media xəbər verir ki, ABŞ-nin “Colossal Biosciences” şirkəti XVII əsrdə nəsli kəsilmiş dodo quşunun bəzi xüsusiyyətlərini yenidən yaratmaq istiqamətində mühüm irəliləyiş əldə edib. Şirkət bu məqsədlə süni intellektdən istifadə edir.

Tədqiqatçılar süni intellekt vasitəsilə dodonun xarakterik baş və üz quruluşunu formalaşdıran genetik xüsusiyyətləri müəyyənləşdirməyə çalışırlar. Şirkətin yeni AI platforması GenoMorph müxtəlif genetik məlumatları və fiziki xüsusiyyətləri müqayisə edərək gen redaktəsi üçün mümkün hədəfləri müəyyənləşdirir.

Layihədə dodonun yaşayan ən yaxın qohumlarından biri hesab edilən Nikobar göyərçinindən istifadə olunması planlaşdırılır. Alimlər genetik redaktə yolu ilə bu quşa dodoya xas bəzi fiziki xüsusiyyətləri qazandırmağa çalışırlar.

Dodonun genomunun təhlili böyük ölçüdə tamamlanıb. Şirkət genetik dəyişikliklərin quşun fiziki xüsusiyyətlərinə necə təsir etdiyini müəyyənləşdirmək üçün araşdırmaları davam etdirir.

Dodo quşunun tam şəkildə geri qaytarıldığı barədə söhbət getmir. Hazırkı layihənin məqsədi nəsli kəsilmiş quşun bəzi genetik və xarici xüsusiyyətlərini yaşayan qohumu üzərində yenidən yaratmaqdır. İlk dodo-bənzər quşun nə vaxt əldə ediləcəyi isə açıqlanmayıb.