Yoldakı çuxur avtomobilə zərər vurarsa, pulu kim ödəməlidir?

1xeber.media xəbər verir ki, yollarda yaranan çalalar və çökmələr sürücülər üçün ciddi problemlər yaradır. Belə hallarda avtomobilə zərər dəydikdə sürücüləri maraqlandıran əsas məsələlərdən biri təmir xərclərinin kim tərəfindən ödənilməli olmasıdır.

Sürücünün təqsiri olmadan, yolun təhlükəli vəziyyətdə olması səbəbindən avtomobilə ziyan dəyərsə, müəyyən hallarda məsuliyyət yolun saxlanılmasına və təhlükəsiz vəziyyətdə olmasına cavabdeh qurumun üzərinə düşə bilər. Bunun üçün yolun hansı qurumun balansında olduğu, eləcə də yolun vəziyyəti ilə dəymiş zərər arasında əlaqə müəyyənləşdirilməlidir.

Belə hadisə baş verdikdə sürücülərə çuxurun, avtomobilə dəyən zərərin foto və videolarını çəkmək, hadisəni müvafiq qaydada rəsmiləşdirmək tövsiyə olunur. Eyni zamanda, avtomobilin təmir xərclərini təsdiqləyən sənədlərin və digər sübutların toplanması vacibdir.

Sürücü toplanmış sənədlərlə yolun saxlanılmasına cavabdeh quruma müraciət edərək dəymiş zərərin ödənilməsini tələb edə bilər. Tələb təmin olunmadıqda isə mübahisənin məhkəmə qaydasında həlli mümkündür.

Kasko sığortası olan avtomobillərdə də zərərin qarşılanması mümkün ola bilər. Lakin bunun üçün sığorta müqaviləsinin şərtləri, əhatə dairəsi və hadisənin sığorta hadisəsi hesab edilib-edilməməsi nəzərə alınmalıdır.