Mask: ABŞ-nin dövlət borcunu süni intellekt azalda bilər

1xeber.media xəbər verir ki, amerikalı sahibkar, “Tesla” və “SpaceX” şirkətlərinin qurucusu İlon Mask ABŞ-nin rekord həddə çatan dövlət borcu probleminin həlli üçün süni intellekt (Sİ) və robot texnologiyalarından istifadəni təklif edib.

“Business Insider” nəşrinin yazdığına görə, Mask bu fikirləri amerikalı yazıçı və jurnalist Uolter Ayzeksonun “The Builders” (“İnşaatçılar”) podkastında səsləndirib.

ABŞ hökumətinin fəaliyyətinin səmərəliliyinin artırılması ilə məşğul olan DOGE qurumuna rəhbərlik etmiş sahibkarın sözlərinə görə, dövlət borcu problemini yalnız xərcləri azaltmaqla həll etmək mümkün deyil. O hesab edir ki, süni intellekt və robotların geniş tətbiqi əmək məhsuldarlığını artıraraq iqtisadi imkanları genişləndirə və borc yükünün azaldılmasına kömək edə bilər.

Maskın fikrincə, bu texnologiyalar iqtisadiyyatda böyük dəyişikliklər yaratmaq potensialına malikdir. Bununla belə, süni intellekt və robot texnologiyalarının dövlət borcunun azaldılmasına konkret təsiri onların tətbiq miqyasından, iqtisadi artımdan və hökumətin büdcə siyasətindən asılı olacaq.