Tokayev Rusiyanın Türk Dövlətləri Təşkilatına qoşulmasını təklif etdi

1xeber.media xəbər verir ki, Qazaxıstan Prezidenti Kasım-Jomart Tokayev Rusiyanın Türk Dövlətləri Təşkilatına (TDT) üzv olması və ya müşahidəçi qismində fəaliyyət göstərməsi təklifini irəli sürüb.

Tokayev bu təkliflə oktyabrın 30-da Ankarada keçirilən TDT sammitində çıxış edərkən səsləndirib.

Qazaxıstan liderinin sözlərinə görə, Rusiyanın təşkilata qoşulmaq niyyətinə müsbət yanaşmaq həm ədalətli qərar olar, həm də qurumun beynəlxalq nüfuzunu artırar.

O bildirib ki, Rusiya böyük dövlət olmaqla yanaşı, əsrlər boyu türk dünyası ilə sıx əlaqələrə malik olub. Həmçinin Rusiyada tarixən çoxsaylı türk xalqları yaşayıb.

Tokayev Rusiyada hazırlanan “Altay – türk sivilizasiyasının beşiyi” layihəsini də dəstəklədiklərini qeyd edib.

Qeyd edək ki, Qazaxıstan Prezidenti Rusiyanın TDT-də iştirakı üçün iki variant təklif edib: təşkilata qoşulmaq və ya müşahidəçi statusu ilə fəaliyyət göstərmək.