Fitso Merzin Ukrayna ultimatumunu şantaj adlandırdı

1xeber.media xəbər verir ki, Slovakiyanın Baş naziri Robert Fitso Almaniya kansleri Fridrix Merzin Ukraynaya maliyyə dəstəyinin göstərilməsi ilə bağlı irəli sürdüyü ultimatumuna sərt reaksiya verib.

Fitso Almaniya kanslerinin mövqeyini şantaj kimi qiymətləndirərək bu yanaşmanı qəbul etmədiyini bildirib. 

“Federal kanslerin etdiyi tipik şantajdır və mən bunu rədd edirəm”, – deyə Slovakiya hökumətinin başçısı qeyd edib.

Məlumata görə, noyabrın 9-da Fridrix Merz Avropa İttifaqının 2028-2034-cü illər üçün nəzərdə tutulan növbəti büdcəsini bloklamaqla hədələyib. O, bunun üçün İttifaqa üzv olan bütün ölkələrin Ukraynanın maliyyələşdirilməsi ilə bağlı öhdəlik götürməsini tələb edib.

Merz bu məsələ ilə bağlı Avropa İttifaqı Şurasının prezidenti Antonio Koştaya məktub ünvanlayaraq Ukraynaya maliyyə yardımının ayrılması barədə razılığın əldə olunmasının vacibliyini vurğulayıb.

Almaniya kanslerinin məktubunda qeyd olunub ki, Kiyev gələn il 70 milyard avro həcmində maliyyə çatışmazlığı ilə üzləşə bilər.

Beləliklə, Ukraynaya maliyyə yardımının davam etdirilməsi məsələsi Avropa İttifaqı daxilində fikir ayrılıqlarına səbəb olmaqda davam edir.